बिना जानकारी भारतीय पक्षले काेशीमा पानी फर्काउँदा ९० नेपाली परिवार सम्पर्क विहीन!

राजविराज – कोशी नदीको बहाव पश्चिमी तटबन्धतर्फ फर्काउने क्रममा भारतीय पक्षले कोसी नदीमा वनाएको प्यालट च्यानलमा शुक्रवार अबेर साँझ एक्कासी पानी छोडदा नेपाल तर्फका झण्डै ९० परिवारका करिब ३सय सर्वसाधारण पछिल्लो २४ घण्टा देखि सम्पर्कविहीन भएका छन्। यो खबर नागरिक न्युजमा जितेन्द्रकुमार झाले लेखेका छन् ।

सप्तरीको हनुमाननगर कंकालिनी नगरपालिका–१२ गोबरगाढाका ९० परिवार पछिल्लो २४ घण्टादेखि सम्पर्कविहीन अवस्थामा रहेको नगरपालिकाका मेयर शैलेशकुमार साहले जानकारी गराए । साहले भने ‘वस्तीको पश्चिम तर्फवाट करिब १७ किलोमिटर लामो प्यालट च्यानल खनिएको थियो, उक्त च्यानलमा पानी छोडदा स्थानिय स्तरमा पूर्व जानकारी गराउनु पर्ने हो तर शुक्रवार साँझ भारतीय पक्षले एक्कासी पानी छोडेपछि यस्तो अवस्था आएको हो।’

आपत्कालीन वचावका लागि राखिएको नगरपालिकाको २ थान डुंगासहित झण्डै आधा दर्जन डुंगाहरु समेत नदीले वगाएर लगेको साहले जानकारी गराए। स्थानीयहरुका अनुसार गाउँलेहरुले संकलन गरेर राखेको काठ दाउरा, घर वनाउन प्रयोग गरिने खडही सहित केही पशु चौपाया समेत नदीको वेगले वगाएको छ। यद्यपि यसवारे आधिकारी तथ्यांक भने नआइसकेको मेयर साहले वताए।

‘हामी सम्पर्कको प्रयासमा छौ, केही स्थानीयहरुसँग फोनमा कुराकानी भए पनि एक्कासी नदीको वहावले सिंगो वस्तीनै घेरीए पछि त्यहाँ सम्म पुग्न वा त्यहाँ फसेकाहरुलाई निकाल्न सक्ने काम गा-हो नै छ’ मेयर साहले भने, ‘मानवीय रुपमा हताहातको सम्भावना अहिले सम्म देखिएको छैन, तर अवस्था यस्तै रहियो भने झन् विकराल स्थिती सृजना हुन सक्छ।’ कोसी नदीमा भारतीयहरुको मनपरी पराकाष्ठा नाघेको मेयर साहको प्रतिक्रिया छ।

‘कोसी सम्झौता अनुसार कोसीमा भारतीय हरुलाई आफु अनुकुल काम गर्ने अधिकार छ तर यसको अर्थ नेपाली पक्षसँग समन्वय नै नगरी गर्ने हैन’ उनले भने, ‘यस नगर पालिकाको एउटा वडा कोसी नदीको बीच भागमै रहेको छ, कोसीमा बाढी आउने समय पनि प्रारम्भ भइसकेको अवस्था छैन यस्तो वेला कृत्रिम रुपमा खनिएको च्यानलमा पानी छोडदा कम्तीम पूर्व जानकारी त हामीलाई गराउनु प-यो हामीलाई जानकारी भएको खण्डमा हामी त्यस अनुरुप आफ्ना नागरिकलाई सुरक्षित स्थानमा राख्ने काम त गर्न सक्थ्यौ।

प्रकाशित मिति May 25, 2019
Loading...